Mövzu ilə bağlı Redaktor.Az-a danışan təhsil eksperti Kamran Əsədov bildirdi ki, bu, o deməkdir ki, müəllim onlara yalnız fənni öyrətməyib, həm də onlarla güclü mənəvi bağ qurub:

"Gəncə şəhəri 34 nömrəli məktəbin 5C sinif şagirdlərinin ingilis dili müəllimləri Cavid Rzayevin işinə bərpa olunmasını tələb etməsi təhsil sistemimiz üçün çox vacib bir nümunədir. Müəllim təkcə bilik verən şəxs deyil, o, eyni zamanda bir sinfin rəhbəri, formalaşdırıcısı, öyrədən və tərbiyə edəndir. Bu gün biz görürük ki, şagirdlər öz müəllimlərinə sahib çıxır, onların haqqını müdafiə edir və onun dərsə qayıtmasını istəyirlər. Bu, elə müəllimlik sənətinin ən ali göstəricisidir".

""Biz müəllimimizi istəyirik, biz müəllimimizə inanırıq!” ifadələri bir çox şeyi sübut edir. Müəllim sadəcə işçi deyil, o, şagirdlərin həyatında dərin iz buraxan şəxsdir. Bəli, məktəbdə qaydalar olmalıdır, bəli, müəllimlər və şagirdlər arasında etik çərçivələr qorunmalıdır, amma müəllimlər də qorunmalıdır. Əgər müəllim işindən uzaqlaşdırılıbsa, onun səviyyəli təhsil verib-verməməsinə, şagirdlərin ona münasibətinə də diqqət yetirilməlidir. Bugünkü hadisə sübut edir ki, Cavid Rzayev sıradan bir müəllim deyil, o, şagirdlərin sevdiyi, onlarla mənəvi bağ quran, onlar üçün dəyərli olan bir müəllimdir", - deyə K.Əsədov bildirdi.