Gender.Az bildirir ki, bunu teleqraf.com-a açıqlamasında Xalq artisti Rafiq Əzimov yaradıcılığında çox az bilinən faktla bağlı danışarkən deyib.

Onun sözlərinə görə, aktyorlar belə nüansları açıqlamağı sevmirlər.

"Təzə-təzə kinostudiyaya ayaqaçdı edəndə rejissor Arif Babayev mənə "Uşaqlığın son gecəsi" filmində fəhlə obrazını həvalə etmişdi. Amma hiss edirdim ki, mənə göz qoyur, hərəkətimə, danışığıma fikir verir. Günlərin bir günü dedi "Ay Əzimov, istəyirəm Muradı sən səsləndirəsən". Bunu heç gözləmirdim. Sonra Muradı oynayan Ənvər Həsənovun bütün hərəkətlərinə, danışıq tərzinə, münasibətlərinə diqqət etməyə başladım. Ona görə də canla-başla çalışırdım ki, Ənvərin oynadığından bir az artıq Muradın danışığına, jestlərinə, sözsüz yerlərdəki münasibətlərinə daha dolğun öz yanaşmamı göstərim.

Çox vaxt aktyorlar belə nüansları açıqlamağı sevmirlər. Başqa aktyorların onları səsləndirməsi bəzi aktyorların xoşuna gəlmir. Mənim obrazımı başqa aktyor səsləndirəndə içimdə hər zaman narahatlıq olur. Axı bu rolu mən ifa etmişəm, dəqiqliyini də özüm bilirəm. Ona görə həmin rollarımdan nigaran qalıram: başqasının danışığı ilə mənim danışığım, münasibətlərim üst-üstə düşəcəkmi? Amma Muradı səsləndirməyim Ənvərin də, rəhmətlik Arifin də çox xoşuna gəlmişdi. Görün neçə il keçib, çoxları inanmır və çoxları da bilmir ki, Muradı mən səsləndirmişəm. Əsas odur ki, obraz yaxşı təqdim olunsun. Film bu gün də sevilir, tamaşaçılar tərəfindən qəbul olunur, bunda mənim də balaca əməyim olduğuna görə sevinirəm".