Gender.az xəbər verir ki, bu barədə Modern.az-a danışan həkim-radioloq Aydın Əliyev maskanın ləğvini tələb edən vətəndaşlara dəstəyini ifadə edib. Onun fikrincə, tibbi maska ilə bağlı qadağa ləğv olunmalıdır.

“Maska qadağaları aradan qaldırılmadır. Absurd yanaşmadır. Təsəvvür edin ki, şadlıq sarayında 500 nəfər toya yığışır, onlar qucaqlaşıb görüşür, bu zaman yoluxma baş vermir. Amma iş yerində iki nəfər bir otaqda oturubsa, maska taxılmalıdır. Bilmirəm bu qərarları necə verirlər, mütəxəssis rəyi nəzərə alınırmı?

Dünyanın əksər ölkələrində artıq maska qadağası götürülür. Pandemiya demək olar ki, bitib və rəsmi olaraq da elan olunacaq. Ona görə bütün karantin qaydaları ləğv edilməlidir. Avtomatik olaraq belə fikir formalaşır ki, maska qadağası cərimələr yazılsın deyə götürülmür?”, - deyən həkim Operativ Qərargahı maska qadağasını ləğv etməyə çağırıb.