Mövzunu Konkret.az-a şərh edən politoloq Tural İsmayılov Rusiya-Ukrayna müharibəsinin tezliklə bitməyəcəyi ilə bağlı hələ münaqişə yeni başlayarkən proqnoz verdiyini deyib: “Hesab edirəm ki, müharibənin bitməyindən danışmaq çox tezdir. Bu müharibədə müxtəlif dövrlərdə qısa fasilələr baş versə və lokal xarakterli atəşkəslər olsa da, geniş anlamda döyüşlər tezliklə yekunlaşmayacaq. Çünki müharibənin bitməsi üçün Rusiya aqressiyasının dayanması lazımdır. Donetsk və Luqanskda qondarma bir bölgənin yaradılması və Krımın Rusiya ərazisi kimi tanınması fonunda Ukrayna və Qərb arasında sərhəd yaratmaq cəhdləri indiki halda reallaşmayacaq. Çünki bu məsələlər Ukraynanın Qərb və NATO-ya inteqrasiyasını daha da sürətləndirir. ABŞ-da qəbul edilən Lend-liz haqqında qanunla Avropa ölkələrinin və Amerikanın Ukrayna ilə sıx əməkdaşlığı başladı və bu, Rusiyanın planlarının suya düşməsi ilə nəticələndi. Ukraynanın NATO və Qərbin hərbi strukturları ilə inteqrasiyası daha da dərinləşdi. Ona görə də, Rusiya-Ukrayna münasibətlərinin post-müharibə dövründə nizamlanması mərhələsi çox uzun müddət davam edəcək”.

Politoloq əlavə edib ki, müharibədən sonra dünyada baş verən ekoloji problemlərin tətiklədiyi inflyasiyalar və qiymət bahalaşmaları daha da üst səviyyəyə çatacaq: “Rusiya-Ukrayna müharibəsinin 2025-ci ilə qədər davam etməsi ehtimalı çoxdur. Bütövlükdə isə nə Rusiyada, nə də Ukraynada yaxın perspektivdə hakimiyyət dəyişikliyi gözlənilmədiyindən müharibənin davamlı olacağı proqnozlaşdırılır”.