Heydər Əliyev Adına Neft Emalı Zavodunun modernləşdirmə prosesində iştirak edən işçilərdən birinin Bakupost.az–a verdiyi məlumata görə, artıq işlər yekunlaşmaq üzrədir. Planlaşdırıldığı kimi, 2022-ci ildə zavodun modernləşdirilməsi prosesi tamamlanacaq. Məlumata görə, işlərin yekunlaşmasına az qaldığı üçün mövsümi işçilər işdən azad edilir. Yanvardan etibarən işçilərin azaldılması prosesi gedir, 200-dən çox işçi ilə yollar ayrılıb.

SOCAR ilin sonundan, ən pis ehtimalla isə 2023-cü ilin əvvəlindən etibarən, yenidən Aİ-95 premium markalı benzinin istehsalına başlayacaq. Bundan sonra isə benzinin bahalaşması gözlənilmir. Çünki indiyə kimi yüksək keyfiyyətli yanacağın bahalaşmasına dünyada neft qiymətlərinin artması, Azərbaycanın isə Aİ-95 premium markalı benzini xaricdən idxal etməsi səbəb göstərilirdi.

Xatırladaq ki, SOCAR şirkəti vaxtilə Aİ-95 premium markalı benzin istehsal edib. Lakin bir neçə il öncə istehsal dayandırılıb. Həmin vaxt şirkət daha keyfiyyətli məhsul istehsal etmək istədiyini elan etmişdi.