Gender.az-ın məlumatına görə, bunu Azərbaycan Turizm Bürosunun baş icraçı direktoru Florian Zenqstşmid deyib.

O bildirib ki, azərbaycanlı turistlərin ən çox üz tutduğu ölkə Gürcüstandır:

"Əcnəbi turistləri ölkəmizə cəlb etməklə yanaşı, yerli turistlərin də bölgələrimizdə istirahət etməsini istərdik. Bunun üçün də regionlarımızda turizmi inkişaf etdirməyə çalışırıq”.

Baş icraçı direktor Rusiyadan Azərbaycana gələn turistlərdən də danışıb. O qeyd edib ki, Gürcüstandakı vəziyyətdən istifadə etməklə Rusiya turistlərini ölkəmizə çəkə bilərik:

"Bunun üçün müxtəlif kampaniyalar keçirməyi düşünürük. Məsələn, Bakı səfərləri, işgüzar görüşlər, konfranslar və şərab marşrutları”.

F.Zenqstşmid ilin sonuna qədər Azərbaycana gələn rusiyalı turistlərin sayının artacağına ümidvar olduğunu deyib:

"Rusiyalı turist Batumidə istirahət planlaşdırıbsa, bu o demək deyil ki, o, Gürcüstan əvəzinə Azərbaycana gələcək. Onlar Türkiyəni və ya regionun digər ölkəsini seçə bilərlər. Elə istiqamət qurmalıyıq ki, Gürcüstanda istirahətini planlaşdıran şəxslər Azərbaycana da üz tutsunlar”. (oxu.az)