Gender.Az bildirir ki, Metbuat.az-ın məlumatına görə, azyaşlılar ağır və zərərli istehsalatlarda, yeraltı işlərdə, barlarda, gecə klublarında, alkoqollu, tütün və narkotik məhsullarla bağlı işlərdə çalışa bilməzlər. Onların təhsil hüququnu poza biləcək işlərə cəlb olunması da yolverilməzdir.

16-18 yaşlı işçilərin əşyaları qaldırma və daşıma işləri normativlərlə məhdudlaşdırılıb. 16 yaşdan kiçik qızlar isə bu işlərə cəlb edilə bilməz. Azyaşlılar yalnız tibbi müayinədən sonra işə qəbul edilir və hər il müayinədən keçirilməlidirlər. Qısaldılmış iş vaxtı ilə işləsələr də, əmək haqqı yaşlı işçilərlə eyni məbləğdə ödənilir.

Qeyd edək ki, gecə növbələri, bayram və istirahət günlərində iş və ezamiyyətlər də azyaşlılar üçün qadağandır. Peşəkarlıq səviyyəsinin kifayət etməməsi səbəbi ilə onların əmək müqaviləsi ləğv edilə bilməz. İşəgötürənlər bu qaydalara əməl etməyə borcludur. Bu təminatlar azyaşlıların sağlamlığı və təhsil hüququnun qorunmasını təmin edir.