Gender.Az bildirir ki, bunu Redaktor.Az-a açıqlamasında Qida Təhlükəsizliyi Hərəkatının rəhbəri, sağlam qidalanma mütəxəssisi Məhsəti Hüseynova bildirdi.

"İstehlakçı məhsulun tərkibində istifadə olunan ətin keyfiyyətli və təhlükəsiz olduğuna əmin olmalıdır. Çünki bəzi hallarda yarımfabrikatların hazırlanması zamanı keyfiyyətsiz ətlərdən, qeyri-standart xammaldan və ya ət adı altında müxtəlif qarışıqlardan istifadə edilə bilər. Bəzi məhsullarda ətin payı azaldılaraq qığırdaq, dəri və digər qida dəyəri aşağı olan hissələrdən istifadə olunduğu hallar da müşahidə edilir. Eyni zamanda, keyfiyyətsiz xammaldan istifadə edildiyi zaman məhsulun dadını, görünüşünü və rəngini dəyişmək üçün süni dadvericilər, rəngləndiricilər və digər kimyəvi əlavələrdən istifadə oluna bilər. Bu cür maddələrdən normadan artıq istifadə isə insan sağlamlığı üçün müəyyən risklər yarada bilər".

"Temperatur rejiminə əməl olunmayan məhsullarda bakteriyaların çoxalması üçün əlverişli mühit yarana bilər. Bu isə qidanın keyfiyyətinin aşağı düşməsinə və insan sağlamlığı üçün təhlükəli hala gəlməsinə səbəb ola bilər. İstehlakçıların diqqət etməli olduğu əsas məqamlardan biri də məhsulun qablaşdırılması və etiket məlumatlarıdır. Qablaşdırmanın üzərində məhsulun tərkibi, istehsalçı haqqında məlumat, hazırlanma tarixi, son istifadə müddəti və saxlanma qaydaları aydın şəkildə göstərilməlidir. Bu məlumatların olmaması və ya natamam təqdim edilməsi məhsulun etibarlılığı ilə bağlı şübhələr yarada bilər".

"Qidanın hazırlanması zamanı iş mühitinin təmizliyi, işçilərin mütəmadi tibbi müayinədən keçməsi və gigiyena normalarına riayət olunması vacibdir. Əks halda, məhsula müxtəlif mikroorqanizmlərin keçməsi və nəticədə istehlakçılarda sağlamlıq problemlərinin yaranması mümkündür. Bu səbəbdən hər hansı yarımfabrikat və ya hazır qida məhsulu alarkən onun mənşəyinə, tərkibinə, saxlanma şəraitinə və istehsalçı məlumatlarına diqqət yetirmək vacibdir. Təhlükəsiz və keyfiyyətli məhsul seçimi sağlamlığın qorunmasında əsas amillərdən biridir".