Hüquq-mühafizə orqanlarındakı mənbələr iyunun 28-də ölüm faktının təfərrüatı barədə Oxu.Az-a məlumat veriblər.

Qeyd edək ki, növbətçi hissənin rəisinin köməkçisi işləmiş polis serjantı E.Əkbərov iyunun 20-də Ağstafada bir şüşə sirkə cövhəri içib. Polis əməkdaşı iyunun 21-də Bakıda xəstəxanada dünyasını dəyişib.

Şahidlərin sözlərinə görə, E.Əkbərov iyunun 20-də intihar etməsindən bir neçə dəqiqə əvvəl evdə olub.

Əvvəlcə o, təcili yardım maşını çağırıb, maşın yolda olarkən mağazadan yenicə aldığı sirkəni içib. Sirkəni içdikdən sonra “Kömək edin, bütün içim yanır!” deyə qışqıraraq küçəyə çıxıb. Polisin yanında olan insanlar ona içmək üçün qatıq veriblər. Ardınca təcili yardım maşını onu aparıb.

E.Əkbərov xəstəxanada ona baş çəkməyə gəlmiş rayon polis rəisi Elsevər Aslanova ölmək istəmədiyini deyib. O, kömək etməyi xahiş edib və belə hərəkət etməsinin səbəbi barədə danışacağını vəd edib. Ancaq polis serjantı bir neçə saatdan sonra Bakıda tibb müəssisəsində ölüb.

E.Əkbərovun həmkarları güman edirlər ki, o, intihar etmək istəməyib, yalnız xəstəxanaya düşmək üçün zəhərlənməyə çalışıb. Lakin sirkə cövhərinin dağıdıcı təsirini nəzərə almayıb. Əks halda, polis əməkdaşı sirkə içməzdən qabaq təcili yardım çağırmazdı.

Onun həyatında intihardan qabaq baş vermiş digər hadisələr də məlumdur.

Bundan bir neçə gün əvvəl polis əməkdaşının qıcolmaları tutub və müdiriyyət onu müayinə və müalicə məqsədilə Daxili İşlər Nazirliyinin hospitalına göndərib. Polis serjantı burada bir həftədən artıq qalıb və işə qayıdıb.

O, iyunun 19-da məişət problemlərini həll etməyin zəruriliyini əsas gətirərək müdiriyyətdən məzuniyyət istəyib. Ancaq E.Əkbərovun həmkarları bundan narazı olublar və bəyan ediblər ki, o, artıq hospitalda istirahət edib. Yekunda E.Əkbərova məzuniyyət verilməyib. Həmkarları imtina cavabı alan E.Əkbərovun ağladığını görüblər.

Daha bir məlumata görə, polis əməkdaşlarından biri bankdan E.Əkbərovun adına 4000 manat həcmində kredit götürüb. Bunun baş vemiş hadisə ilə hansı əlaqəsi olduğunu istintaq müəyyənləşdirməlidir.

Bu arada, polis əməkdaşının ölümündən sonra yayılan şayiələrə görə, o, oğlan uşağı istədiyi halda həyat yoldaşının qız uşağı gözlədiyinə görə intihar edib.

Başqa bir versiya ər-arvad arasındakı münasibətlərdə yaranmış problemlə bağlıdır. Lakin mənbələrin fikrincə, E.Əkbərovun ölümünün əsas səbəbi işdəki münasibətlə əlaqədardır.

Qeyd edək ki, faktla bağlı təhqiqatı Ağstafa Rayon Prokurorluğu aparır.