Ermənistan silahlı qüvvələrinin diversiya qrupu qeyd olunan ərazilərdə dərə boşluqlarını minalamaqla bölmələrimizə basqın etməyə cəhd göstərib. Azərbaycan Ordusunun bölmələri tərəfindən görülən cavab tədbirləri nəticəsində qarşı tərəf geri çəkilməyə məcbur edilib.

Qeyd edək ki, Ermənistan tərəfi sentyabrın 21-də Azərbaycan Ordusunun bölmələri tərəfindən guya atəş açılması barədə dezinformasiya yaymaqla gecə saatlarında törətdikləri təxribata zəmin yaratmağa çalışıb.

Mövzu ilə bağlı Sfera.az-a açıqlama verən millət vəkili Asim Mollazadə bildirib ki, Ermənistanın bu gecə təxribata əl atması, atəşkəsi pozması əslində ABŞ dövlət katibi Entoni Blinkenin sülh təşəbbüsünə və danışıqları öz üzərinə götürməyinə cavab idi:

“Ermənistan öz müttəfiqlərinə nümayiş etdirmək istəyir ki, onlar heç bir halda ABŞ-ın sülh istiqamətində təşəbbüsü üzərinə götürməyinə imkan verməyəcəklər. Ümumiyyətlə, Ermənistan sülh istəmir, hər an təxribat törətməyə hazırdırlar. Bütün bunlar isə dünya üçün çox təhlükəli siqnaldır. Dünyanın nüfuzlu ölkələri, beynəlxalq təşkilatlar Ermənistanın bu hərəkətlərinə diqqət yetirməlidir. Azərbaycan Ermənistanı sülhə məcbur etməyə qadirdir və bununla bağlı problemlər yoxdur. Amma dövlətimiz hər zaman öz addımlarını beynəlxalq hüquq normalarına uyğun atır. Fikrimcə, Ermənistanın qurduğu oyunlar onlara baha başa gələcək. Səbrli olmaq lazımdır, beynəlxalq təşkilatları proseslə bağlı ciddi məlumatlandıraraq, onlardan tələb etmək lazımdır ki, Ermənistanın bu oyunlarına son qoyulsun və sülhə məcbur edilsinlər. Düşünürəm ki, ABŞ Ermənistanla bağlı siyasətində ciddi qərarlar verməlidir ki, erməni təxribatlarına tamamilə son qoyulsun”.

Ermənistanın Azərbaycanın gücünə bələd olduğunu vurğulayan politoloq Cümşüd Nuriyev isə söyləyib ki, iki il öncə sentyabr ayında təxribat törətdilər və nəticədə Ordumuz 44 günlük müharibədə onların layiqli cavabını verdi:

Ermənistanda həm ölkə daxilindəki revanşist qüvvələr, həm də Qərbyönümlü qüvvələr Paşinyana qarşı çıxır. Baş nazirin ardıcıl olmayan mövqeyi Rusiyanı da qane etmir. Kreml artıq Paşinyanın hakimiyyətdə qalmasında maraqlı deyil. Bu baxımdan Paşinyan çıxılmaz dalana dirənib, sərsəmləməsi də bununla bağlıdır. Qeyri-adekvat addımlar atır və görünən odur ki, psixoloji durumunda ciddi problemlər var. İrəvanın küçələrində KTMT və Rusiyaya qarşı çıxışlar olur, Moskvanı çox məsələdə ittiham edirlər. Bu, çox yaxşıdır. Çünki Rusiya 200 ildə erməniləri tanıya bilməmişdi, indi isə Azərbaycanın köməyi ilə tanımağa başladılar. Azərbaycan addımlarında hansısa səhvə yol vermir. Baxmayaraq ki, ölkə daxilində və xaricində dövlətimizin əleyhinə çalışan qüvvələr var, sapı özümüzdən olan baltalar Azərbaycanı Ermənistana təcavüzadə ittiham etdilər”. \\Sfera