Bu barədə analitik Arqişti Kiviryan “Power Factor” verilişində müsahibəsində deyib.

“Çox şey Ukraynadakı vəziyyətdən, Rusiya Federasiyasının münaqişədən hansı formada çıxacağından asılı olacaq. Onun bölgəmizdəki addımları bundan asılı olacaq. Moskva zəifləyərək çıxsa, Qərb onu buradan sıxışdırmağa çalışacaq. Rusiya daha güclü çıxsa, onun iddialarını reallaşdıracağı növbəti yer Cənubi Qafqaz olacaq. Orta Asiyanı daha asan “udmaq” üçün Moskva Cənubi Qafqaza nəzarəti ələ keçirməli, bununla da bir çox yolları kəsməli və Türkiyənin təsir problemini həll etməli olacaq”, – Kiviryan deyib.

“Əgər Rusiya Federasiyası münaqişədən zəifləyərək çıxsa, o zaman Bakı bu məsələni qaldıracaq. Azərbaycan təkcə bunu gözləmir, həm də Kiyevə silahla kömək edir. Bakı başa düşür ki, Moskva Ukraynada qalib gəlsə, o zaman Azərbaycan sülhməramlıların mandatı baxımından ciddi problemlə üzləşəcək. Əks halda, Azərbaycan sülhməramlılarının Qarabağdan çıxarılmasında israr etməyə başlayacaq. Orada erməni elementinin olması bundan asılıdır. 44 günlük müharibədən sonra Moskvanın vasitəçiliyi ilə 3 sənəd imzalanıb, ona görə də Rusiya Federasiyası indi Brüssel proseslərinə qısqanclıqla yanaşır.

Ancaq mən düşünmürəm ki, o, özünə qarşı ciddi təhlükələr hiss edir, çünki Qarabağda Rusiya sülhməramlıları var. Həm də təkcə orada deyil, həm də Ermənistanla Azərbaycan arasındakı sərhəd zonasında. Ona görə də təşəbbüs Rusiya Federasiyasının əlindədir”, – deyə Kiviryan əlavə edib.

“Yaxın gələcəkdə ciddi dəyişikliklərin olacağını düşünmürəm. Müəyyən fəaliyyət yalnız delimitasiya və demarkasiya istiqamətində başlaya bilər, lakin bu proses həm də onilliklər boyu uzana bilər. Rabitə məsələsində də fəaliyyət başlaya bilər, amma burada da sülh müqaviləsinin imzalanmasının yaxın gələcəyin işi olduğuna şübhə edirəm. Prosesləri ancaq dünya gücləri sürətləndirə bilər. Ermənistanda kimin hakimiyyətdə olacağından da çox şey asılı olacaq”.

“Ermənistan hakimiyyəti Qarabağdan əllərini çəkib. Bütün təhlükəsizlik məsələlərini Moskvanın çiyninə atıb, hətta sərhədlərinin, daha sonra isə Qarabağ ermənilərinin təhlükəsizliyini təmin etmək üçün mövqelərini bərpa etməyə belə cəhd göstərmir. Onlar ancaq müəyyən qədər maliyyə yardımı göstərirlər və beynəlxalq platformada Qarabağ məsələsi ilə məşğul olurlar”, – deyə Kiviryan bildirib.

“Bu cür hərəkətlər yolverilməzdir. Bu şıltaqlıqlar, Nikolun siyasəti müharibəyə və biabırçı nəticələrə gətirib çıxardı. Nə qədər ki, hakimiyyətdə qalacaq, Ermənistanla nə edəcəkləri onun vecinə deyil. O, bir vaxtlar “Haykakan Jamanak” qəzetinə rəhbərlik etdiyi kimi ölkəyə rəhbərlik edir. Ermənistan hakimiyyəti belə bir iş görməyəcək, nəyin bahasına olursa-olsun öz yerlərini saxlamağa hazırdırlar. Beynəlxalq ictimaiyyət, eləcə də Azərbaycan tərəfindən ələ salınır”, – deyə ekspert vurğulayıb.

Onun fikrincə, fövqəlgüclərin ziddiyyətləri ilə oynayan Ermənistanın yeni hakimiyyət orqanları savadlı yanaşma ilə ölkəni mövcud vəziyyətdən çıxara və Qarabağ ermənilərinin təhlükəsizliyini təmin edə bilər.

“Türkiyəyə gəlincə, 44 günlük müharibədən sonra Azərbaycan üzərində artan nüfuzundan fəal şəkildə istifadə edir. Ankaranın artıq Azərbaycan ordusunda ciddi təsiri var ki, bu da digər sahələrə yayılacaq. Bu, baş verən kimi Ankaranın Azərbaycanla bağlı siyasəti dəyişəcək”, – deyə o, fikirlərini yekunlaşdırıb. \\KONKRET.az