Gender.Az bildirir ki, mövzunu Konkret.Az-a şərh edən təhsil eksperti Nadir İsrafilov bildirib ki, məktəbəqədər tərbiyəni təhsilə çevirmək doğru deyil:

“Gənclərə yol vermək lazımdır. Amma bunu təcrübəli insanları işdən çıxarmaq bahasına etməməliyik. Elə çıxır ki, 30 il keçməsinə baxmayaraq biz hələ də keçid dövrünü yaşayırıq. Yalnız xarici dövlətlərin təcrübəsini mənimsəməyə çalışırıq. Ama bu, normal hal deyil. Əgər xarici təcrübədən danışırıqsa, bunu hər istiqamətdə nəzərə almalıyıq. Məsələn, Lüksemburqda bir müəllimin aylıq maaşı bizim pedaqoqun illik gəlirindən yüksəkdir. Ona görə də, xarici təcrübəni kopyalamaq olmaz. Bu gün bizim orta məktəblərdə məntiq bir dərslik kimi keçirilmir. Amma imtahanlara məntiqdən suallar salırıq. Uşaqlar ən çox məhz bundan çaş-baş qalır. Digər tərəfdən, Eynşteyn deyirdi ki, “məntiq elm deyil”. Çünki hər kəsin məntiqi fərqli ola bilər. Bir dönəmdə baxçalara məntiqdən suallar salırdılar. İndi də birinci sinifə gedən uşaqlara ağıllarına gələn sualları verirlər. Riyaziyat müəlliminə “klarneti kim kəşf edib?” sualını verirlər, kimyaçıdan, “Azərbaycanda buzlaşma nə vaxt olub” soruşurlar. Bu kimi suallar xeyli müzakirələrə səbəb olur. Onların məntiqi belədir ki, uşaqları guya erkən inkişafa hazırlayırlar. Amma uşaqları tələsdirmək doğru deyil. Birinci sinifə məgər informatika dərsi salarlar? Yaxud birinci sinif şagirdinə ingilis dili keçmək nə vacibdir? Bizim nəsil ingilis dilini 5-ci sinifdən keçib. Kimin ağlına nə gəlirsə, onu da tətbiq edir. Bu cür problemlərin yaranmasının səbəbini xaricdə təhsil alanların rəhbər vəzifələrə təyin olunmasında görürəm. Onlar da xarici düşüncəni Azərbaycanda tətbiq edirlər. Məsələnin kökündə məhz bu faktor dayanır”.