Gender.az-ın verdiyi məlumata görə, bu barədə Redaktor.Az-a açıqlamasında «Elm» İctimai Birliyinin sədri, elm və təhsil üzrə ekspert Səbuhi Abdullayev bildirdi.

«Magistratura təhsili ali təhsilin ikinci pilləsi sayılır və belə deyək ki, bizim şifahi olaraq bildiyimiz, tam ali təhsil kimi beynimizdə qalan bir anlayış var. Yəni hansısa ali təhsil müəssisəsini bitirən şəxslər yarımçıq təhsil almış hesab olunmur, ali təhsil almış sayılırlar. Ancaq ali təhsilin ikinci pilləsi olduğuna görə magistratura adlandırılaraq tam ali təhsil kimi qəbul edilir.

Ümumiyyətlə, magistratura təhsili almaqla bağlı, onun önəmi ilə bağlı son zamanlar bir çox suallar verilir və onların içərisində, təbii ki, marağın azalması ilə bağlı məsələlər də var. Bunun əsas səbəblərindən biri odur ki, magistratura təhsilinin önəmi işə qəbul zamanı nisbətən azalıb. Ən xüsusilə də burada əməkhaqqı differensiasiyasında fərq olmadığına görə maraq nisbətən azalıb», — deyə o vurğuladı.