Gender.az xəbər verir ki, Dövlət Statistika Komitəsinin hesabatına əsasən, yanvar-mart aylarında respublikaya 650,2 min ABŞ dolları dəyərində 530 ton "Aİ-98" ("Super") markalı avtomobil benzini idxal edilib. Rəsmi rəqəmlər göstərir ki, ötən ilin müvafiq dövrü ilə müqayisədə yanacağın dəyəri 19 faiz, ümumi həcmi isə 18 faiz aşağı düşüb.

Hesabat dövründə xaricdən alınan bu markalı benzinin coğrafiyasında bəzi dəyişikliklər baş verib. Belə ki, Azərbaycan 16 aylıq fasilədən sonra Belarusdan yanacaq tədarükünü yenidən bərpa edib və bu ölkədən 293,5 min dollar dəyərində 239,4 ton benzin gətirilib. Eyni zamanda, Rumıniyadan edilən idxalın həcmi və dəyəri ötən ilin eyni ayları ilə müqayisədə 46 faiz artaraq 168,7 ton (206,8 min dollar) təşkil edib. Rusiyadan alınan yanacağın həm həcmində, həm də dəyərində təxminən 49 faizlik kəskin azalma qeydə alınıb və bu ölkədən 122,3 ton (150 min dollar) məhsul idxal olunub.

Məlumat üçün bildirək ki, 2025-ci ildə ölkəyə gətirilən "Aİ-98" markalı benzinin əsas hissəsi, yəni 45,2 faizi Rumıniyanın, 40,1 faizi isə Rusiyanın payına düşmüşdü.

Yəni, rəsmi rəqəmlərə əsasən, Azərbaycana xaricdən gətirilən baha və keyfiyyətli "Super" markalı benzinin miqdarı bu ilin ilk üç ayında keçən illə müqayisədə azalıb, həmçinin uzun fasilədən sonra Belarusdan yenidən benzin alınmağa başlanılıb.