Gender.az bildirir ki, mövzu ilə bağlı KONKRET.az-a açıqlama verən iqtisadçı Natiq Cəfərli bildirib ki, əsl problem pensiya yaşında deyil, onun məbləğinin aşağı olmasındadır:

 

“Əlbəttə ki, pensiya yaşına çatmamış kimsəsiz qadınlara daha tez pensiya təyin edilə bilər və edilməlidir. Amma hazırkı qanunvericilikdə bu məsələ tam şəkildə nəzərdə tutulmur. Qanunda müəyyən güzəştlər var, lakin onlar kifayət etmir”.

 

İqtisadçının sözlərinə görə, yüksək maaş alan şəxslər üçün erkən pensiya cəlbedici görünmür:

 

“Əgər işləyən, yüksək maaş alan bir qadına desək ki, təqaüdə tez çıx, o bunu istəməyəcək. Çünki hazırda aldığı maaş məsələn 1000 manatdırsa, pensiyası 400 manat olacaq. Bu səbəbdən insanlar işləməyə üstünlük verirlər. Əsas məsələ pensiyaların artırılmasıdır. Pensiya məbləğləri yüksəldikdən sonra növbəti mərhələdə pensiya yaşı ilə bağlı daha geniş müzakirələr aparmaq mümkün olacaq”.

 

Ekspert hesab edir ki, xüsusilə kimsəsiz və sosial müdafiəyə ehtiyacı olan qadınlarla bağlı ayrıca sosial təminat mexanizmlərinin hazırlanması vacibdir.