2026-cı ildə təqdim olunması gözlənilən "iPhone 18 Pro" seriyası ilə bağlı yeni iddialar gündəmə gəlib.

Gender.Az xəbər verir ki, məlumata görə," Apple" bu dəfə əsas fərqi texniki xüsusiyyətlərdən çox qiymət strategiyası ilə yaratmağı planlaşdırır.

İddialara əsasən, şirkət artan istehsal xərclərinə baxmayaraq qiymətləri sabit saxlamaq niyyətindədir. Belə ki, "iPhone 18 Pro" modelinin 1049 dollar (1700 AZN), "Pro Max" versiyasının isə 1199 dollar (2038 AZN) civarında satışa çıxacağı gözlənilir. Bu addım rəqiblərin qiymət artımına getdiyi bir dövrdə "Apple"a üstünlük qazandıra bilər.

Lakin bu strategiyanın müəyyən kompromisləri olacaq. Bildirilir ki, şirkət xərcləri balanslaşdırmaq üçün rəng seçimlərini azaldacaq. Yeni modellərin yalnız üç rəngdə - tünd boz, tünd qırmızı və gümüşü-ağ variantlarda təqdim olunacağı ehtimal edilir.

Texniki tərəfdən isə seriyanın yeniliklərlə gələcəyi gözlənilir. Sızmalara görə, cihazlarda daha kiçik "Dynamic Island", yeni nəsil modem, təkmilləşdirilmiş kamera sistemi və 2 nm texnologiyası əsasında hazırlanmış A20 Pro çipi istifadə olunacaq.

Ümumilikdə, qiymətin sabit qalması ilə yanaşı təqdim ediləcək yeniliklər iPhone 18 Pro seriyasını bazarda daha cəlbedici edə bilər.(milli.az)