"Google" süni intellekt sahəsində "OpenAI" ilə rəqabətdə istifadəçi tərəfində üstünlük qazanır. 

Şirkətin "Gemini" tətbiqi "Apple"ın "App Store" platformasında pulsuz tətbiqlər siyahısında zirvəyə yüksələrək, təxminən üç il əvvəl süni intellekt dalğasını başlatmış ChatGPT-ni arxada qoyub.

Bu uğurun arxasında "Gemini"nin yeni "Flash" modeli çərçivəsində təqdim olunan "Nano Banana" adlı şəkil redaktə funksiyası dayanır. Sözügedən xüsusiyyət istifadəçilərə yüklədikləri fotoları birləşdirərək və mətn əmrləri vasitəsilə rəqəmsal fiqurlar yaratmaq imkanı verir. "Nano Banana" qısa zamanda böyük maraq toplayaraq "Gemini"nin istifadəçi bazasının sürətlə genişlənməsinə səbəb olub.

Şirkətin məhsul rəhbəri Coş Vudvardın açıqlamasına görə, "Nano Banana"nın istifadəyə verilməsindən cəmi dörd gün sonra tətbiq 13 milyon yeni istifadəçi qazanıb və ümumi istifadəçi sayı 23 milyona çatıb. Bu müddətdə tətbiqə 500 milyondan artıq foto yüklənib. Yaranan böyük tələbat səbəbilə həftəsonu müvəqqəti istifadə məhdudiyyətləri tətbiq olunub.

"Google"un istehlakçı yönümlü süni intellekt sahəsindəki yüksəlişi investorların da diqqətini cəlb edib. Qısa müddət əvvəl "Alphabet" 3 trilyon dollarlıq bazar dəyərinə çataraq "Nvidia", "Microsoft" və "Apple" ilə eyni kluba daxil olub. Şirkətin səhmləri bu il 33 faiz artaraq "Nasdaq"ın 16 faizlik göstəricisini geridə qoyub. Bu artım "Chrome" brauzerinin mövqelərini qorumasına imkan verən müsbət antitrest qərarı ilə də güclənib.

Son açıqlanan rəsmi məlumatlara görə, iyul ayında "Gemini"nin aylıq aktiv istifadəçi sayı 450 milyonu ötüb. Yeni funksiyaların əlavə edilməsi ilə bu göstəricinin daha da artacağı gözlənilir. \\Valyuta.az