Qanunvericiliyə əsasən, kiçik elektrik nəqliyyat vasitəsi, gücü 1 kVt-dan çox olmayan elektrik mühərriki ilə təchiz edilən, bir nəfərin daşınması üçün nəzərdə tutulan fərdi vasitədir. Bu vasitələr sükanlı və ya sükanı olmayan, jest, mimika və ya səsli komanda ilə idarə edilə bilən, özünü tarazlayan texnologiyaya malik olur.

Qanuna görə, KENV-lərin hərəkətinə park və həyət ərazilərində, yaşayış zonalarında, velosiped yollarında və ümumi istifadə üçün nəzərdə tutulmuş yolların sağ kənar zolağında yol nişanları və nişanlanma tələblərinə əməl etməklə icazə verilir. Avtomagistrallarda isə bu vasitələrin hərəkəti qadağandır.

Vəkil qeyd edib ki, qanunvericiliyə əsasən, KENV sürücülərinə aşağıdakılar qadağandır:

-Velosiped yolu olduğu halda onun yanındakı yolda hərəkət etmək

-Yük aparmaqla KENV-in ölçülərini 0,5 metrdən artıq aşmaq;

-Nasaz və ya texniki tələblərə cavab verməyən vasitədən istifadə etmək.

“Onların parklanması yalnız bu vasitələr üçün nəzərdə tutulmuş yerlərdə aparılmalıdır. Bu yerlər və onların istismar qaydaları aidiyyəti icra hakimiyyəti orqanları tərəfindən müəyyənləşdirilir.

Yeni tələblər piyadaların təhlükəsizliyinin artırılması, şəhər nəqliyyatının tənzimlənməsi və elektromobillərin istifadəsinin təhlükəsiz formada təşviqinə xidmət edir”.

“Qayda pozuntusu üçün 40 manat cərimə nəzərdə tutulur. Sürücü əgər yol hərəkəti hadisəsi törədirsə, cəriməsi daha çoxdur. Mövcud yol hərəkəti qaydalarına əsasən moped və skuter sürücüləri qaydalara əməl etməli, yolun hərəkət istiqamətinin sağ tərəfində hərəkətdə olmalıdırrlar”.