- Qadın mövzusu vaxtaşırı gündəmə gəlirsə, deməli, cəmiyyətin qadın tərəfində ciddi aktivlik yaranıb. Və bu aktivlik kişilərdə qıcıq doğurur. Bütün bu kimi sayıqlamalar cəmiyyətin kişi tərəfinin həmin qıcıqdan doğan reaksiyasıdır. Daha dəqiq ifadə etsək, qorxusudur. Fikir ver, kim qadına düşmən kimi baxırsa, həmin kəs qadından it kimi qorxur. Söhbət fiziki qorxudan getmir. Mahiyyətcə qadından qorxur.

- Heç kəs heç kəsdən qorxmamalıdır. Nə kişi qadından, nə qadın kişidən, nə kişi kişidən, nə qadın qadından. Cəsarət insanın istedadıdır. Cəsarətli yaşamaq lazımdır. Hörmət, ehtiram da məhz bu zaman yaranır. Qorxu olan yerdə hörmət əlamətləri öləziyir. Mən mahiyyətcə matriarxat tərəfdarıyam. İstəyirəm bütün ciddi postlarda qadınlar dayansın, bütün dünyada. Onsuz da proses ora gedir. Kişilərdə yaradılış etibarilə fiziki güc çoxdur. Ona görə bütün ağır işləri kişilərə, ağıl işlərini qadınlara tapşırmalıyıq. Əlbəttə, bu cümləni oxuyub qımışan həmvətənlər çox olacaq. Amma bir dəqiqəlik düşünüb dünyanın rənginin necə dəyişəcəyini təsəvvür etsələr, zövqlü adamlar razılaşarlar. Qadına ehtiram zövqlü adamların işidir. Buyur, bu da təzə tezis.

- Maşın sürmək ağır və riskli işdir. Dedim axı, ağır işləri kişilərə tapşırmaq lazımdır. Qadın sadəcə, maşını zövq üçün sürməlidir. İndiki dövrdə, məxsusən, Bakı küçələrinin hazırkı xaotik, iflic vəziyyətində qadın niyə maşın sürmək əzabına qatlaşmalıdır? Maşın sürmək özü ayrıca bir işdir. Elə qadınlar var, həm avtomobil idarə edirlər, həm də, məsələn, həkimdir. Təsəvvür et, bu iki işi birlikdə görmək gör adamdan nə qədər enerji aparır. Hələ düşünsək, qadın olmaq da özlüyündə başqa bir işdir. Hər gün gözəl, baxımlı görünmək üçün bilirsən nə qədər əziyyət çəkir qadınlar?

- Bu çox absurd və gülünc iddiadır. Akif müəllim, görünür, empirizmdən tamam uzaqdır. Belə gülünc iddialara baş qoşmaq lazım deyil. Vaxt israfıdır. Akif müəllimdir də. Cavan oğlansan, ərinmə, hava da iki gündür sərindir, hələ sən get Akif müəllimə keçən günlərini qaytar, gör gələn günlərini qurban verəcək, ya yox? Əvvəlcədən deyim ki, yox, qətiyyən. Rəhmətlik Rəfiq Zəka Xəndan qurban verdi. Bəli. Amma Akif müəllim verməz.

- Bu haqda bilgim yoxdur. Ona görə cavab verə bilməyəcəm.

- Azərbaycanda feminizmin mahiyyətini başa düşəcək çox az adam var. Hay-küy və qara-qışqırıq feminizmi gözdən salır. Əslində, feminizm çox mübarək və mübahdır. Bizdə bir neçə "çılğın gənc" feminizmi "bədən mənimdir, kimə istəsəm verərəm" kimi başa düşdü. Amma feminizm "zəka mənimdir, ömür mənimdir, imkan ver, zəkamı və ömrümü faydalı yaşayım, zəkamı və ömrümü kimə istəsəm, verərəm"dir.

Şairanə, poetik düşüncələri də elə deyirsən, guya səfeh bir şeydir. Dünya düşüncə, fəlsəfə tarixi poetik fikrə borcludur, şairanə düşüncə axının üzərində inşa olunub. Əlbəttə, poetik düşünmək mənim həyat tərzimdir. Və əlbəttə, feministəm. Zövqlü kişilər feminist olur. Dünyanı zövqləndirmək, mənalandırmaq istəyən hər kəs feminist olmalıdır. Bu da təbii, zövq məsələsidir.

- Hərdən belə də olur:

Allaha deyirəm

Ki,

günəşə görə çox sağ ol;

yağışa görə də,

küləyə görə də,

və sairə...

Hərdən belə də olur:

Allaha deyirəm

Ki,

o qadına görə çox sağ ol;

əllərinə görə,

gülüşünə görə,

yerişinə görə də,

və sairə...

Hərdən də olur ki,

bircə günəşin xatirinə sabaha çıxmaq istəyirsən,

bircə qadının xatirinə başqa bütün sabahlara...

Hərdən də olur ki,

heç nə olmur

bax,

belə...