Təhsil eksperti Kamran Əsədov Referans.Az-a açıqlamasında bildirib ki, doktorantura pilləsi çox vacib bir mərhələdir, lakin son illərdə Azərbaycanda bu pilləyə qəbul ürəkaçan deyil.

“Birinci yerdə plan yerlərinin boş qalması, ikinci yerdə isə etiraf edək ki, doktoranturaya qəbul heç də şəffaf şəkildə həyata keçirilmir. Belə ki, ali təhsil müəəsisələri və yaxud da doktorantura qəbulu həyata keçirən elmi müəssisələr və təşkilatlar bu prosesi heç də şəffaf həyata keçirmir. Biz ciddi şəkildə ixtisas imtahanları zamanı pozuntuları müşahidə edirik. Ümumilikdə, doktorantura pilləsinə qəbul qaydaları təmamilə formatda həyata keçirilməlidir. Minimum iddiaçının xarici dil bilikləri yoxlana bilər, çünki gələcək tədqiqatçı xarici mənbələrdən də istifadə etməlidir. Məsələn, doktoranturaya qəbul zamanı tələb olunan fəlsəfə imtahanının heç bir əhəmiyyəti yoxdur”.

“Bu gün doktorantura pilləsini bitirib müdafiə edənlərin sayı çox azdır. Uzun müddətdir ki, dissertasiya işlərinin həyata keçirilməsində biz nöqsanlar müşahidə edirik. Xüsusən, Milli Elmlər Akademiyasında və ya institutlarda gənslərin elmə gəlməsində ciddi şəkildə problemlər və maneələr yaradılır. Hesab edirəm ki, doktoranturanın formatında dəyişiklik mütləqdir. Hazırda Azərbaycanda 30 yaşdan kiçik elmlər doktoru demək olar ki, yoxdur. Müdafiə olunan işlərin əksəriyyəti müasir dövrün tələblərinə, əmək bazarının tələblərinə cavab vermir”.

Kamran Əsədov son olaraq vurğulayıb ki, bu məsələdə əsas addım mərkəzləşmiş imtahanın təşkil olunmasıdır.