Təhlükəsizlik eksperti Elmar Nurəliyev Demokrat.az-a açıqlamasında yanğın təhlükəsizliyi qaydaları barədə məlumat verib. O qeyd edib ki, ilk növbədə tonqal qalanacaq yeri düzgün seçmək lazımdır:

“Tonqalın qalanacağı yerdən ən az 15 metr məsafədə tez alışan əşyalar olmamalıdır. Nəqliyyat vasitələrinin yaxınlığında, yüksək gərginlikli elektrik xətlərinin keçdiyi ərazilərdə tonqal qalamaq olmaz. Yer səthinə metal lövhə qoyulmalı, onun üzərində qalamaq lazımdır. Bu onun üçündür ki, asfalt örtük korlanmasın və yerdə qalan qığılcımlar ətrafa səpələnməsin. Tonqalın maksimum hündürlüyü 1 metr 50 santimetri keçməməlidir. Yalnız ocağın tam söndüyünə əmin olduqdan sonra məkanı tərk etmək olar”.

Ekspert deyib ki, uşaqları nəzarətsiz buraxmaq olmaz:

“Valideyn nəzarəti altında olmalıdır uşaqlar. Tonqal ətrafında pirotexniki vasitələrdən, fişənglərdən istifadə etmək yolverilməzdir. Yandırılan odun, taxta parçalarının üzərində lak, boya və ya hər hansı digər kimyəvi maddənin olmamasına diqqət edilməlidir. Tonqalın içərisinə metal, tənəkə, şüşə, konserv qabları, rezin və s. bu kimi materiallar atmaq olmaz. Xüsusilə də təkər şinlərinin yandırılması məqsədəuyğun deyil. Bunlardan ayrılan tüstülərin tərkibində toksik maddələr var və zəhərlənməyə səbəb ola bilər”.