Aşağı kalori və yüksək lif mənbəyi olan alma təbiətin bizə bəxş etdiyi ən güclü "super qidalardan" biridir. Lakin mütəxəssislər bildirirlər ki, almanın faydasını maksimuma çatdırmaq üçün onu günün ilk saatlarında, acqarına qəbul etmək lazımdır. 

Səhər yeyilən bir ədəd alma bədəndə zəncirvari müsbət dəyişikliklərə səbəb olur.

Acqarına yeyilən alma mədəni yumşaq şəkildə "oyadır" və həzm prosesini başladır. Almanın tərkibindəki pektin lifi bağırsaq mikroflorasını tənzimləyir, maddələr mübadiləsini sürətləndirir və xroniki qəbizlik problemini aradan qaldırır. Bu, həm də bədəndən toksinlərin kənarlaşdırılması üçün ən təbii yoldur.

Səhərlər qəhvə yerinə alma yemək daha sağlam seçim ola bilər. Tərkibindəki təbii fruktoza sürətlə qana qarışaraq bədənə gümrahlıq verir və beyin fəaliyyətini aktivləşdirir. Eyni zamanda, yüksək lif və su tərkibi sayəsində alma aclıq hissini nəzarətdə saxlayır, sizi nahar vaxtına qədər tox tutur. Bu da artıq çəkidən qurtulmaq istəyənlər üçün ideal vasitədir.

Mütəmadi olaraq səhərlər alma yemək "pis" xolesterinin (LDL) səviyyəsini aşağı salır, damarların elastikliyini qoruyur və ürək-damar sisteminin fəaliyyətini dəstəkləyir.

Yaşıl alma mədə turşuluğunu tarazlayır və qan şəkərini tənzimləməyə kömək edir. Qırmızı alma isə tərkibindəki yüksək antioksidantlar sayəsində hüceyrələrin qocalmasını ləngidir və immuniteti gücləndirir.

Unutmayın ki, almanı qabığı ilə birlikdə yemək daha faydalıdır, çünki vitamin və liflərin böyük hissəsi məhz qabıq hissəsində cəmləşib.\\Milli.Az