Bəs, bu ilin oktyabrında Avropada keçiriləcək Qərbi Azərbaycanla bağlı əhəmiyyətli tədbirdə hansı mesajlar veriləcək?

Mövzu ilə bağlı Demokrat.az-a açıqlamasında “Azərbaycanlıların və digər türkdilli xalqların əməkdaşlıq Mərkəzi” İctimai Birliyinın (ATXƏM) sədri İlham İsmayılov bildirib ki, əsas məqsəd və mesajlar tədbirdə bildiriləcək.

İlham İsmayılovun sözlərinə görə, tədbir üçün əsasən Avropanın əsas siyasi mərkəzi olan Brüssel şəhəri seçilib:

“Bu "Qərbi Azərbaycana Qayıdış" mövzusunda bizim ikinci tədbirimizdir. Birinci layihə keçən il Haaqa şəhərində Avropada yaşayan Qərbi Azərbaycanlılar mövzusu idi. Hər layihə Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir. İkinci layihəmiz oktyabr ayında baş tutacaq. Bu dəfə  “Qərbi Azərbaycana qayıdışın hüquqi aspektləri və təminatı” mövzusudur. Tədbir Avropanın əsas mərkəzi olan Brüssel şəhərində keçiriləcək. Orada bizim tərəfdaş təşkilatlar var. Həmçinin, Türkiyə media qurumları və yerli media qurumları da cəlb olunacaq.  Eyni zamanda Brüsseldə fəaliyyət göstərən bir çox beynəlxalq təşkilatların nümayəndələrinin, Avropa Parlamenti üzvlərinin, yerli mətbuat orqanlarının iştiraki gözlənilir. Layihənin həyata keçirilməsində tərəfdaş təşkilatlar, Belçika-Azərbaycan Dostluq Cəmiyyətinin sədri Ayxan Dəmirci, Türk Ocaqları Gent-Belçika Mərkəzinin rəhbəri Rəcəb Tuncer Sarı və Belçika -Türkcə Media Birliyinin sədri Hüseyn Dönməz iştirak edəcəklər.  Mesaj isə Qərbi Azərbaycandan vaxtilə sürgün, deportasiya olunmuş insanların öz ata-baba yurdlarına qayıtmağının hüquqi aspektləri və qayıtdıqdan sonrakı təminatları mövzusu olacaq. Tədbirin əsas əhəmiyyəti bundan ibarət olacaq”.