Naxçıvan Muxtar Respublikası (MR) Ali Məclisinin keçmiş sədri Vasif Talıbov vəzifəsindən istefa verdikdən sonra onun iqtisadi təsir imkanlarını zəiflədilməsi prosesinə start verildi. Talıbovun nəzarətində olan Azərbaycandakı iri biznes subyektləri əlindən alındı, eyni zamanda onun xaricdəki biznesi ilə bağlı araşdırmalara başlanıldı. Hər halda bu barədə yerli mediada gedən məlumatlar təkzib olunmayıb.

Vasif Talıbovun biznes imperiyasına əl qoyulması onunla bağlı baş verənlərin kökündə iqtisadi səbəblərin dayanması barədə mülahizələrə səbəb oldu. Lakin keçmiş sədrlə bağlı atılan müəyyən addımlar prosesin heç də iqtisadi səbəblərdən qaynaqlanmadığı barədə ehtimalları artrıb.

Oğlu Seymur Talıbovun işdən çıxarılması, ona yaxın kadrların ard-arda vəzifələrini itirməsi, yaxın vaxtlarda keçmiş sədrin deputat mandatını da itirəcəyi barədə məlumatlar “xan”ın mərkəzi hakimiyyətin yürütdüyü siyasətə zidd kurs tutması barədə hələlik pıçıltı ilə səsləndirilən iddiaların əsassız olmadığı qənaətini möhkəmləndirib.

Vasif Talıbovla bağlı atılacağı gözlənilən addımlar da onun siyasi səbəblərdən neytrallaşdığı qənaətində olan arqumentləri gücləndirib.

Keçmiş sədrlə bağlı növbəti addımlara gəlincə, Qaynarinfo-ya daxil olan məlumatda iddia olunur ki, ona verilmiş ordenlər də geri alına bilər.

Məlumat üçün deyək ki, Vasif Talıbov 2010-cu ildə “Şöhrət”, 2020-ci ildə isə “Şərəf” ordeni ilə təltif edilib. Hər iki orden yüksək mükafat sayılır. Vasif Talıbov “Şöhrət” ordenini Azərbaycanda qanunvericiliyin təkmilləşdirilməsi və sosial-iqtisadi inkişafın təmin olunmasında göstərdiyi xidmətlərə, “Şərəf” ordenini isə Azərbaycanda dövlət quruculuğu işlərində xüsusi xidmətlərinə görə alıb.