Əmlak məsələləri üzrə ekspert Elnur Fərzəliyev Referans.Az-a bildirib ki, bu qərarın əmlak bazarına ciddi şəkildə təsiri gözlənilməsə də, hərbçilərin sosial rifahının yaxşılaşdırılmasında böyük rol oynayacaq.

“Bu qərar hərbçilərin rifahı baxımından olduqca məqsədəuyğun qərardır. Bu baxımdan əmlak bazarına hansısa mənfi təsir gözlənilmir. Müsbət təsir isə hərbçilərin sosial sıxıntılarının müəyyən qədər həll olmasıdır. Belə ki, 5 faizli güzəştli kreditlər limitli formadadır. Hərbçilərimiz də maksimum dərəcədə bu güzəştdən istifadə edə bilir”.

“Təxminən 5-6 il əvvəl 4 faizli ipotekalar üçün 100 min manat məbləğində, digər 8 faizli ipotekalara isə 150 minə qədər məbləğdə kredit ayırılırdı. Yəni ev almaq üçün bu məbləğin üzərinə pul qoyulmalı idi. İpoteka üçün nəzərdə tutulmuş evlərə yeni tikili binalar, torpaqlı və sifarişlə tikilən həyət evləri, 70-ci illərdən sonra tikilmiş xüsusən 9 mərtəbəli binalar aiddir. Bakı şəhərində mərkəz və mərkəzə yaxın ərazilərdə 1 otaqlı Leninqrad, Kiyev və digər 9 mərtəbəli binalarda mənzillərin satış qiyməti artıq 115-120 min manatdır. 1 otaqlı yeni tikililər təxminən 130 min manatdan başlayıb 180 min manata qədər dəyişir. Belə olan halda təbii ki, həmin evlərin qiymətinin 15 faizinin dövlət tərəfindən ödənilməsi hərbçilər üçün böyük dəstəkdir. Hətta biz hesablasaq görərik ki, bu evin məbləğinin bir neçə illik ödənişidir”.