Gender.Az bildirir ki, bu sözləri Pravda.az-a Milli Məclisin Mədəniyyət komitəsinin üzvü Əziz Ələkbərli  Şuşada mütəfəkkirlər, dövlət xadimləri, hərb qəhrəmanlarına heykəl qoyulmaması ilə bağlı səslənən iradlara münasibət bildirərkən deyib.

Deputat xatırladıb ki, cənab Prezident tərəfindən bu il “Şuşa İli” elan olunub: “Şuşanın əvvəlki simasının özünə qaytarılması, insanların doğma yurduna geri dönməsi prioritet məsələdir. Diqqəti bu məsələlərdən yayındırıb, “niyə ədəbiyyatçılara heykəl qoyulub, başqalarına yox?” müzakirəsi açmağın özü yolverilməzdir. İnsanlarımız 30 ildir, yurd həsrəti ilə yanıb-qovrulur. Bu gün hər kəs Qarabağda quruculuq işlərinə töhfəsini verməlidir, qalan məsələlər zamanla həllini tapacaq. Azərbaycanın bütün bölgələrindən, o cümlədən Şuşa şəhərindən zaman-zaman xeyli tarixi şəxsiyyətlər – elm, mədəniyyət, ədəbiyyat, dövlət xadimləri, hərbçilər və başqaları çıxıb. Təbii ki, onların hər birinin Azərbaycan tarixində öz yeri var, hər birinin adı əbədiləşdirilməlidir və əbədiləşdirilir də. Azərbaycan xalqı qədirbilən xalqdır, Azərbaycan dövləti də bu məsələni həmişə diqqət mərkəzində saxlayıb. Təkcə belə bir faktı xatırlatmaq kifayətdir ki, ulu öndər Heydər Əliyev hakimiyyətinin birinci dövründə Bakıda neçə-neçə tarixi şəxsiyyətimizin abidəsinin ucaldılmasına nail olub. Bu yerdə möhtərəm Prezidentimiz İlham Əliyevin Şuşanın simvolu olan Üzeyir Hacıbəyovun, Xurşidbanu Natəvanın, Bülbülün, Vaqifin abidələrinə həssas münasibətini xatırlatmamaq da mümkün deyil”.